Кремљ соопшти дека барањето на Зеленски за нуклеарно оружје „се граничи со лудило“

ИСТАНБУЛ (АА) - Кремљ денес соопшти дека барањето на украинскиот претседател Владимир Зеленски за нуклеарно оружје е акт што „се граничи со лудило“, јавува Анадолу.

Говорејќи пред новинарите во руската престолнина Москва, портпаролот на Кремљ, Дмитриј Песков, ја критикуваше идејата дека Украина треба да добие нуклеарно оружје во доволна количина за да ја одврати Русија.

„Ваквите изјави и коментари генерално се граничат со лудило. Меѓу другото, постои режим на неширење на нуклеарното оружје“, рече Песков.

Зеленски во интервјуто со британскиот новинар Пирс Морган доцна синоќа изјави дека на Киев треба да му се даде нуклеарно оружје за да се обезбеди неговата безбедност доколку процесот за членство на Украина во НАТО трае предолго.

Тој праша какви гаранции ќе има Украина доколку пристапот во НАТО остане неизвесен, велејќи: „Дали ќе ни дадат нуклеарно оружје? Нека ни дадат нуклеарно оружје.“

„Дали ќе ни дадат доволно проектили за да ја запреме Русија, во што се сомневам? Но ова (давањето нуклеарно оружје) ќе помогне“, додаде тој.

- Планот на Трамп да ја „преземе“ Газа -

Песков, исто така, го коментираше планот на американскиот претседател Доналд Трамп да ја „преземе“ Газа, велејќи дека Кремљ ги забележал неговите изјави.

„Да, ги слушнавме изјавите на господин Трамп за ова прашање“, рече Песков. „Исто така, видовме и слушнавме изјави од Аман и Каиро кои ја отфрлаат оваа идеја.“

Тој додаде дека Русија гледа што се случува на Блискиот Исток.

За време на прес-конференцијата со израелскиот премиер Бенјамин Нетанјаху во Вашингтон вчера, Трамп рече дека САД „ќе ја преземат“ Газа откако ќе ги преместат Палестинците на друго место според планот за обнова за кој тој тврдеше дека може да ја претвори енклавата во „ривиера на Блискиот Исток“.