Кремљ: Oдлуката за црноморскиот договор за жито ќе биде објавена тогаш кога ќе биде донесена

ИСТАНБУЛ (АА) - Јавноста ќе биде информирана за тоа кога ќе биде усвоена одлуката на Русија за продолжување на Црноморската иницијатива за жито, објави денес Кремљ, јавува Анадолу.

„Ќе ве информираме кога ќе биде донесена соодветна одлука. Тоа е сè што можам да кажам“, изјави портпаролот на Кремљ, Дмитриј Песков, на брифингот во Москва.

Песков рече дека контактите меѓу сите страни на договорот за жито, кој истекува в четврток, се во тек и дека сè уште се отворени многу прашања во однос на спроведувањето на делот од договорот поврзан со Русија.

Туркије, Обединетите нации, Русија и Украина потпишаа договор во јули минатата година во Истанбул за продолжување на извозот на жито од три украински пристаништа на Црното Море, што беше суспендиран по почетокот на руско-украинската војна во февруари 2022 година.

Во Истанбул е формиран заеднички координативен центар на трите земји и ОН за следење на пратките.

Според податоците на ОН, од август минатата година од Украина се извезени повеќе од 30 милиони тони жито и прехранбени производи.

Русија побара да се отстранат пречките за извоз на ѓубрива, поточно банкарските ограничувања, за да се согласи на уште едно продолжување на договорот за жито.