Кралот на Шпанија Фелипе Шести повика на „траен прекин на огнот во Газа“

МАДРИД (АА) - Кралот на Шпанија Фелипе Шести ја повика меѓународната заедница да прогласи траен прекин на огнот во Газа, да гарантира испорака на хуманитарна помош за палестинскиот народ, а Хамас безусловно и веднаш да ги ослободи заложниците, јавува Анадолу.

Обраќајќи им се на амбасадорите на 126 земји акредитирани во Шпанија во Кралската палата во Мадрид, кралот Фелипе Шести рече: „Трагедијата во Газа ја потресува совеста на човештвото“.

Кралот Фелипе Шести го повтори „дводржавното решение, во рамките на кое државите Израел и Палестина се признаваат под еднакви услови, целосно независни и со јасни граници“, што левичарската коалициска влада во Шпанија постојано го нагласува пред меѓународната заедница.

Осврнувајќи се на руската инвазија на Украина, која наскоро ќе ја наврши својата втора година, кралот Фелипе Шести рече: „Русија без причина и неправедно ја нападна Украина. Нашата земја ќе продолжи да работи со своите европски и меѓународни партнери, целосно почитувајќи ја Повелбата на Обединетите нации, за да се постигне глобален, праведен и траен мир во Украина.“