Комитетот на Државната дума препорачува да се суспендира учеството на Русија во договорот „Нов СТАРТ“

ИСТАНБУЛ (АА) - Долниот дом на рускиот Парламент, Комитетот за меѓународни прашања на Државната дума, рано утринава препорача Долниот дом да усвои нацрт-закон за суспендирање на учеството на Москва во нуклеарниот договор „Нов СТАРТ“, јавува Анадолу.

„Комитетот за меѓународни прашања едногласно препорача усвојување на нацрт-законот за суспензија на учеството во „Нов СТАРТ“. Предложено е прашањето да се поднесе на разгледување на денешната пленарна седница“, изјави шефот на Комитетот, Леонид Слуцки за Руската државна новинска агенција ТАСС.

Препораката на Комитетот следува по вчерашната одлука на рускиот претседател Владимир Путин да го суспендира учеството на неговата земја во договорот, кој беше единствениот преостанат договор за контрола на оружјето што Москва го имаше со Вашингтон.

Путин, во обраќањето до рускиот Парламент, познат и како Федерално собрание, рече дека договорот „Нов СТАРТ“ е потпишан во фундаментално различна политичка реалност и повеќе не ја одразува ситуацијата.

Путин истакна и дека е свесен за плановите на САД да тестираат ново нуклеарно оружје и му наложи на руското Министерство за одбрана да се подготви за тестирање на руски нуклеарни оружја како одговор.

Потпишан во 2010 година и продолжен во 2021 година за уште пет години, договорот „Нов СТАРТ“ има за цел да ги контролира и намали стратешките нуклеарни сили што ги користат САД и Русија.