Италијанскиот вулкан Етна продолжува да исфрла пепел и лава

РИМ (АА) - Вулканот Етна во Јужна Италија од синоќа до утрово повторно исфрли пепел и лава, објавија денес локалните медиуми.

Кратерот Вораџине, каде што се забележани вулкански ерупции во последните денови, повторно почна ноќта да исфрла пепел и лава, изјавија локални извори за Анадолу.

Вулканските ерупции во кратерот продолжија до раните утрински часови, истакнаа тие.

Поради вулканските ерупции на Етна некои авиони што требаше да слетаат на аеродромот „Фонтанароса“ во Катанија беа пренасочени кон блискиот аеродром во Палермо, а некои летови се одложени, објавија италијанските медиуми.

Сепак, аеродромот не беше затворен за воздушен сообраќај и покрај активноста на Етна.

- Висината на Етна над морското ниво се менува

Опсерваторијата Етна, поврзана со Италијанскиот национален институт за геофизика и вулканологија (INGV), дополнително објави дека вулканот Етна, кој немаше никаква ерупција од 2021 година, ја зголемил својата висина над морското ниво како резултат на вулканските активности во кратерот Вораџине од минатата недела.

Наведено е дека висината на кратерот Вораџине, кој во последните денови често исфрла пепел и лава во Етна, достигна 3.369 метри поради акумулираната лава и го надмина југоисточниот кратер висок 3.347 метри, еден од најактивните кратери на вулканот.

Утврдено е дека нивото на кратерот е пораснато особено при мерењата направени по интензивните вулкански активности од 5 до 7 јули.

Вулканот Етна, кај кој во последните недели е забележана вулканска активност со исфрлање пепел, лава, проток на лава и потреси, е највисок активен вулкан на континентот.