ИСТАНБУЛ (АА) – Иран утринава лансираше три ракети кон северниот дел на Израел, објави израелскиот „Канал 12“, пренесува Анадолу.

Сирените за воздушен напад се огласија низ поголем дел од подрачјата на северен Израел, додека телевизискиот канал објави дека во тек се напори за пресретнување на проектилите.

Иранската државна телевизија тврди дека иранските ракети стигнале до пристанишниот град Хаифа само неколку минути по изјавите на американскиот претседател Доналд Трамп дека во Иран има останато само ограничен број ракетни лансери.

Претходно денес во телевизиското обраќање од Белата куќа, Трамп рече дека на Иран му останале „многу малку“ ракетни лансери, додавајќи дека неговата способност за лансирање ракети и беспилотни летала е „драматично намалена“.

Трамп, исто така, им порача на Американците дека очекува војната против Иран да продолжи уште две до три недели, но истакна оти верува дека конфликтот се приближува кон својот крај.

Регионалната ескалација продолжи откако Израел и САД започнаа офанзива против Иран на 28 февруари, во која досега загинаа повеќе од 1.340 луѓе, меѓу кои и тогашниот врховен лидер, ајатолахот Али Хамнеи.

Техеран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив во кои се наоѓаат американски воени бази, предизвикувајќи жртви и инфраструктурна штета, нарушувајќи ги глобалните пазари и авиосообраќајот.