Иран ги отфрли обвинувањата за вмешаност во обидот за атентат на Трамп

ТЕХЕРАН (АА) - Иран ги отфрли обвинувањата за наводна вмешаност во атентатот на поранешниот американски претседател Доналд Трамп, објави денес државната новинска агенција ИРНА, пренесува Анадолу.

ИРНА го цитираше портпаролот на иранското Министерство за надворешни работи, Насер Канани, кој рече дека Иран „силно отфрла каква било вмешаност во неодамнешниот вооружен напад врз Трамп или тврдењата за иранска намера за таква акција“.

„Исламската Република Иран е решена да поведе правна постапка против Трамп за неговата директна улога во злосторството за убиство на генералот Касем Сулејмани“, рече Канани.

Сулејмани беше командант на елитната единица на Иранската револуционерна гарда и беше убиен на 3 јануари 2020 година во напад со американски дрон пред аеродромот во Багдад, Ирак.

Американските медиуми вчера пренесоа дека Соединетите Американски Држави (САД) неодамна добиле разузнавачки информации од извори за ирански заговор за атентат на поранешниот претседател Доналд Трамп.

Иранскиот амбасадор при Обединетите нации, Амир Саид Иравани, вчера ги отфрли обвинувањата против Техеран како „неосновани“ и „политички мотивирани“.