Индонезија: Боингот 737, кој некогаш се користеше како патнички авион, претворен во ресторан

ЏAКАРТА (АА) - МАХМУТ АТАНУР -

Авион од типот „Боинг 737“, кој некогаш се користеше како патнички авион во авиокомпанијата „Лајон ерлајнс“ во Индонезија, е претворен во ресторан, пишува Агенција Анадолија (AA).

Ланецот ресторани наречен „Steak 21“, познат по своето специјално мени во многу региони на земјата, е отворен во авионот „Боинг 737“, кој престана да лета во 2017 година.

Голем број домашни и странски туристи го посетуваат ресторанот во авион поставен на паркинг на трговски центар во градот Бекаси. Авионот е во оригинална состојба, променети се само навлаките на седиштата.

Директорот на ресторанот, Усул Хикматула, рече дека ресторан во авион е интересна опција за оние што сакаат да јадат во поинаков концепт и дека клиентите се задоволни од услугата.

„Вработените носат облека на стјуардеси и пилоти. На нашите клиенти им нудиме и можност на крајот да се фотографираат во кокпитот“, рече Хикматула.

Тие работат околу 3,5 години, а капацитетот на ресторанот е 87 лица.

Хикматула рече дека во рамките на мерките против новиот вид коронавирус го намалиле капацитетот на 40 гости и дека во моментов работат со резервации.

Деа Резанти, една од гостите, изјави дека се одлучила да го посети овој ресторан поради целосно различниот концепт.