Ekip
07 Јуни 2022•Ажурирај: 07 Јуни 2022
АНКАРА (АА) - Повеќе од 50 италијански кланови на организиран криминал, вклучително и 'Ндрангета, со илјадници членови дејствуваат во Австралија, предупреди полицијата во земјата, јавува Агенција Анадолија (АА).
Овие групи работат заедно со нивните италијански партнери и „перат милијарди долари годишно преку австралиската економија“, ја контролираат незаконската трговија со дрога и го продолжуваат насилството преку локалните ограноци, според Најџел Рајан, помошник-комесар на Австралиската федерална полиција (AFP).
Тој рече дека плановите на Австралиската федерална полиција (AFP) се да цели кон овие групи на организиран криминал „напаѓајќи ги нивните финансии, комуникации и операции“.
„Ние имаме околу 51 клан на организиран криминал во Австралија. Идентификувавме 14 потврдени кланови 'Ндрангета низ Австралија, во кои се вклучени илјадници членови“, рече Рајан.
„'Ндрангета не е само австралиски проблем - тие се глобален проблем и тие се одговорни за трговијата на 70 проценти од кокаинот во светот. Во Австралија, тие исто така се одговорни и за трговијата со канабис и метамфетамин.“
'Ндрангета, според Рајан, „ја преплавува Австралија со недозволени дроги и ги контролира австралиските банди со мотоцикли“, за кои тој рече дека се одговорни за „некои од најголемите насилства“ во земјата.
Операцијата „Ајронсајд“, масовна тригодишна операција, предводена од АФП, доведе до тоа 383 наводни престапници да бидат обвинети за 2.340 прекршоци.
АФП и Федералното биро за истраги на САД (FBI) измамија личности од подземјето да комуницираат преку шифрирана апликација наречена „ANoM“.
„За време на операцијата Ајронсајд, органите на редот обвинија голем број членови на 'Ндрангета, некои кои ги следеа наредбите од нивните шефови во Калабрија“, рече Рајан.
Тој рече дека непроценливите податоци добиени преку „ANoM“ помогнале во „отстранување на наметката на тајност која им дозволуваше на членовите на 'Ндрангета да дејствуваат во Австралија неказнето“, но прифати дека соборувањето на групата останува застрашувачки предизвик.
„Тие беа во можност да останат незабележани живеејќи скромни животи во скромни домови. Тие ги мешаат нивните испрани пари со пари од нивните легитимни градежни, земјоделски или угостителски бизниси и сето тоа го отежнува не само идентификувањето на криминалот, туку и докажувањето“, објасни тој.
Рајан рече дека АФП особено ќе се фокусира на „разбивање на организациите за перење на пари... (и) продолжува да ги бара платформите за комуникација што се користат за планирање на нивниот криминал“.
