Израелските сили убија еден и ранија 15 Палестинци во Газа

ГАЗА (АА) - Израелските безбедносни сили убија еден, а ранија 15 Палестинци кои протестираа во Газа поради 15-годишната израелска блокада на енклавата, пренесува Агенција Анадолија (АА).

Министерството за здравство во Газа соопшти дека израелските војници употребиле огнено оружје и големо количество солзавец за да ги растераат палестинските демонстранти кои се собрале на источната граница на Газа.

Во соопштението се наведува дека 26-годишниот Ахмед Мустафа Салих од бегалскиот камп Џабалија бил убиен во пукотницата.

Меѓу 15-те ранети има и неколку малолетници.

Палестинските млади лица веќе шести ден по ред протестираат на границата со Газа, поради 15-годишната израелска блокада во регионот.