Mohammad Sıo
12 Август 2024•Ажурирај: 13 Август 2024
КУДС (ЕРУСАЛИМ) (АА) - Израелскиот премиер Бенјамин Нетанјаху денес им наложи на министрите од неговата влада да се воздржат од јавни изјави поврзани со безбедносните прашања, пренесува Анадолу.
Овој потег доаѓа во време на растечки очекувања во Израел за потенцијални одмазднички напади од Иран и либанската група Хезболах како одговор на атентатите на нивни високи претставници, меѓу кои и лидерот на Политичкото биро на палестинската група Хамас, Исмаил Ханије, во Техеран и командантот на Хезболах, Фуад Шукр, во Бејрут.
Според израелскиот јавен радиодифузер КАН, Нетанјаху „ги предупредил своите министри да не дискутираат за безбедносни прашања во наредните денови, нагласувајќи ја „критичната природа“ на ситуацијата.
КАН објави дека Израел се подготвува за поширок ирански напад, потенцијално поопсежен од нападот со дронови во април, кога Израел беше цел на десетици проектили и дронови.
„Новите проценки во Израел укажуваат дека Иран останува одлучен да го изврши овој напад и покрај неодамнешните индикации дека можеби отстапил поради политички притисоци“, додаде КАН.
„Сегашните проценки сугерираат дека Иран планирал напад од големи размери на клучни стратешки точки во Израел“, се наведува, и се додава: „Точното време на овој ирански напад останува непознато, но со оглед на тековната размена на закани меѓу Иран и Израел, следните денови се очекува да бидат исклучително тензични.“
Израел, прекршувајќи ја резолуцијата на Советот за безбедност на Обединетите нации со која се бара итен прекин на огнот, се соочи со меѓународна осуда поради континуираната брутална офанзива врз Газа по нападот на Хамас на 7 октомври.
Според локалните здравствени власти, оттогаш во израелските напади загинаа над 39.800 лица, главно жени и деца, а повредени се над 92.000.
Повеќе од 10 месеци по почетокот на израелските напади огромни делови на Газа се во урнатини, каде што постои и блокада за храна, чиста вода и лекови.
Израел е обвинет за геноцид пред Меѓународниот суд на правдата (МСП), кој му нареди веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред да започне копнената офанзива врз градот на 6 мај.
