Израелската армија ја опколи болницата Камал Адван на северниот дел на Појасот Газа

ГАЗА (АА) - Израелската армија ја опколи болницата Камал Адван во северниот дел на Појасот Газа, соопшти денес Министерството за здравство на палестинската енклава, пренесува Анадолу.

„Животите на пациентите во болницата се загрозени“, предупредува Министерството во соопштението.

Директорот на болницата Ахмад ал-Кахлут рече дека израелските сили стационирани во близина на објектот во градот Беит Лахиа „пукаат кон секој што ќе се обиде да влезе во болницата“.

„Израелската армија ја опколи болницата со тенкови и друго оружје и ги гаѓа сите патишта што водат до зградата“, изјави Ал-Кахлут за Анадолу.

Тој истакна дека две жени и две деца биле убиени во израелски напад врз породилиштето во болницата.

Израел ја продолжи својата воена офанзива врз Појасот Газа на 1 декември по завршувањето на еднонеделното хуманитарно примирје постигнато со палестинската група Хамас.

Според податоците на здравствените власти во Газа, 18.205 Палестинци се убиени, а повеќе од 49.645 се ранети во немилосрдните воздушни и копнени напади врз енклавата од 7 октомври по прекуграничен напад на Хамас.

Според официјални податоци, бројот на загинати Израелци во нападите на Хамас изнесува 1.200.