Израелската армија соопшти дека нема „потврда“ за наводите дека „Хамас обезглавувал бебиња“

КУДС (АА) - Израелската армија нема информации кои ги потврдуваат наводите дека „Хамас обезглавувал бебиња“, изјави за Анадолу канцеларијата на портпаролот на израелската армија, пренесува Анадолу.

Се тврдеше дека вооруженото крило на Хамас, бригадите Касам, „обезглавиле многу израелски бебиња“ за време на нападот во саботата рано наутро од Газа.

Кога Анадолу телефонски контактираше со канцеларијата на портпаролот на израелската армија и праша за наводите, одговорот гласеше „Ја видовме веста, но немаме никакви детали или потврда за тоа“.

Ситуацијата ескалираше во Појасот Газа по нападите на палестинската група Хамас. Израел возврати со воздушни напади и ја стави енклавата под целосна блокада.

Исто така, го прекина снабдувањето со вода и електрична енергија на Газа, со што се влоши и онака лошата хуманитарна ситуација.

Во насилствата загинаа најмалку 2.100 луѓе, од кои 900 Палестинци и 1.200 Израелци.

Појасот Газа кој е дом на речиси 2,2 милиони луѓе, од 2007 година е под израелска блокада.