Израел изврши воздушен напад врз воена позиција во Сирија, ранети се осум војници

ИДЛИБ (АА) – Најмалку осум војници се повредени во израелски воздушен напад врз воена позиција во близина на аеродромот во Дамаск, главниот град на Сирија, пренесува Анадолу.

„Осум војници се повредени синоќа при израелски воздушен напад во близина на главниот град Дамаск“, објави прорежимската сириска новинска агенција САНА.

Нападот е извршен од правец на окупираниот сириски Голан, а погодена е и позиција во близина на воениот аеродром Ал Мезе во Дамаск.

Израел и сирискиот режим не дадоа официјални изјави за овој инцидент.

Израел периодично извршува напади врз групи и воени позиции поддржани од Иран поврзани со војската на сирискиот режим од почетокот на сириската граѓанска војна.