ИСТАНБУЛ (АА) – Украинскиот претседател Владимир Зеленски денес соопшти дека обезбедил повеќе од 1,1 милијарда евра за поддршка во одбраната и енергетиката по посетите на Грција, Франција и Шпанија, оценувајќи дека договорите ќе ја зајакнат украинската противвоздушна одбрана, авијација и енергетската безбедност во зимскиот период, пренесува Анадолу.

Во објава на Телеграм, Зеленски рече дека Грција ќе обезбеди гарантирани количини гас за грејната сезона, како дел од договорот потпишан во Атина, нарекувајќи ја земјата „важен енергетски центар за Украина и за Централна и Источна Европа“.

Тој најави дека Франција се согласила значително да ја прошири одбранбената соработка, вклучително и планот за Украина да набави 100 авиони „Рафале Ф4“ до 2035 година, како и системи за ПВО САМП/T, напредни радари, ракети „воздух-воздух“ и управувани воздушни бомби.

Париз исто така ќе испорача нов пакет воена помош до крајот на годината.

„Шпанија“, додаде тој, „вети 100 милиони евра за иницијативата ПУРЛ за ракети за воздушна одбрана, 215 милиони евра во рамките на инструментот САФЕ и 200 милиони евра за поддршка на енергетскиот сектор на Украина.

Иницијативата за листа на приоритетни барања за Украина (PURL) е програма на САД и НАТО која овозможува европските и канадските членки на Алијансата да финансираат набавка на американско оружје за Украина.

Мадрид подготвува и дополнителен одбранбен пакет што ќе вклучи ракети ИРИС-Т за противвоздушна одбрана.

- Посета на Зеленски на Анкара 

Претходно во текот на денот, украинска делегација предводена од Зеленски пристигна во Анкара и го посети Аниткабир, мавзолејот на основачот на Турската Република, Мустафа Кемал Ататурк.

Неговиот шеф на Кабинет, Андриј Ермак, соопшти дека разговорите се одвиваат „во деловна и работна атмосфера“ и дека продолжува координацијата со претставници од администрацијата на американскиот претседател Доналд Трамп, вклучително и пратеникот Стив Виткоф.