Жителите на Харков одат на риболов на блиското езеро за да се ослободат од стресот од војната

ХАРКОВ/ИСТАНБУЛ (АА) - Многу цивили во регионот Харков во источна Украина одат на риболов во езерото во близина, кое во овој дел од годината е покриено со мраз, за да се ослободат од стресот предизвикан од војната со Русија додека конфликтот се приближува до 11-от месец од почетокот, јавува Агенција Анадолија (АА).

Луѓето кои живеат околу Чухуив патуваат до селото Нова Хнилица и езерото, каде што се подготвуваат за риболов и покрај тоа што температурите паѓаат до -10 степени Целзиусови во текот на денот.

„Доживеавме голем стрес за време на окупацијата. Риболовот ми помага да го надминам стресот“, изјави 64-годишниот Виктор Сергеев за АА, истакнувајќи дека риболовот го сака уште од своето детство.

Додека се обидуваше да лови риби од дупките што ги направи во езерото, каде дебелината на мразот надминува 15 сантиметри, Сергеев рече дека многу луѓе и од околните градови доаѓаат на езерото.

Тој истакна дека семејствата се соочуваат со сериозни економски тешкотии во регионот поради влијанието на војната и дека рибата што ја лови на езерото ја носи дома.

Педесет и тригодишниот Виталиј Герцев, кој дојде на езерото од блискиот град Балаклија, истакна дека животот во регионот полека почнал да се нормализира и дека можностите за вработување се значително намалени бидејќи инфраструктурата каде што живее е сериозно оштетена поради конфликтот.

Раскажа дека работи на бензинска пумпа, а во слободните денови оди на риболов бидејќи риболовот ги ослободува од стресот.

Тој додаде дека многу луѓе во регионот се борат да преживеат, што го отсликува горчливото лице на војната, и рече дека повеќето луѓе ловат риба во близина на нивните домови за да ги прехранат своите семејства.