ЕУ: Русија не испорачува дополнителен гас, и покрај високите цени

БРИСЕЛ

Претседателката на Европската комисија (ЕУ), Урсула фон дер Лајен, денеска изјави дека актуелните геополитички тензии имаат цена и дека Русија нема намера да испраќа повеќе гас во Европа, и покрај многу високите цени, јавува Агенција Анадолија (АА).

Говорејќи на настанот „Денови на индустријата на ЕУ“ во Брисел, Фон дер Лајен укажа на брзото зголемување на цената на бензинот во Европа и потсети дека Европа увезува 90 отсто од својот гас.

Таа додаде дека побарувачката за гас е зголемена на глобално ниво поради економското закрепнување.

„Актуелните геополитички тензии исто така имаат цена. Повеќе од 40 отсто од нашиот гас се увезува од Русија. Русија не изгледа заинтересирана за зголемување на снабдувањето со гас, и покрај моментално високите цени“, рече Фон дер Лајен.

Нагласувајќи дека зафатеноста на капацитетите за складирање гас во Европа е под потребното ниво, Фон дер Лајен објасни дека испораките на гас во Европа преку гасоводот „Јамал“ на „Гаспром“ и преку Украина се, исто така, на ниско ниво.

„Сево ова укажува дека „Гаспром“ не се однесува како обичен снабдувач со гас. Интересите на компанијата и политиката се чини дека се испреплетени“, рече Фон дер Лајен.

Таа изјави дека ЕУ активно преговара со партнери како САД, Норвешка, Алжир, Азербејџан и Катар за снабдување со гас и дека Комисијата на ЕУ во блиска иднина ќе им предложи различни мерки на земјите членки.