ЕУ значително ги зголеми проекциите за очекуваниот економски раст на Турција

БРИСЕЛ (АА) - Европската Унија (ЕУ) ги зголеми проекциите за очекуваниот економски раст на Република Турција од три на 5,3 отсто за оваа, а од 3,3 на четири отсто за наредната година, додека за 2019 година предвиде економски раст од 4,1%, јавува Anadolu Agency (AA).

Европската комисија објави извештај за проекциите на економскиот раст за есен 2017 година, а во однос на претходниот извештај, најголемата промена се однесува на зголемување на очекуваната стапка во економскиот раст на Турција.

Во новиот извештај на ЕУ беше ревидирана и очекуваната стапка на невработеност во Турција, па така, очекуваната стапка за оваа година е намалена од 13,6 на 11,3; за наредната година од 14,1 на 11 отсто, додека очекуваната стапка за 2019 година е 10,7 отсто.

Според експертите на ЕУ, зголемувањето на стапката на очекуваниот економски раст и намалената невработеност во Турција се темелат на стабилната странска побарувачка, замавот на градежниот сектор, широката фискална политика и добрите гаранции за кредитите во таа земја.

Во извештајот се предвидува дека еврозоната оваа година ќе оствари економски раст од 2,2, а наредната година за 2,1 отсто. За 2019 година е најавен раст од 1,9 отсто.

Слична е сликата и кога е во прашање целата ЕУ, каде што оваа година се очекува раст од 2,3 отсто, а во наредните две години од по 2,1 и 1,9 отсто.

Во еврозоната и во ЕУ се очекува и да се намали невработеноста за помалку од еден отсто во наредните три години.

Кризата предизвикана од севернокорејската нуклеарна закана и од излезот на Велика Британија од ЕУ се наведуваат како некои од најголемите ризици за економијата на еврозоната и ЕУ за наредниот период.