Ahmet Gençtürk
31 Декември 2021•Ажурирај: 03 Јануари 2022
АНКАРА
Турскиот претседател Реџеп Таип Ердоган денеска изјави дека 2021 година докажала дека сегашниот глобален поредок што се појавил по Втората светска војна не може да се дозволи да продолжи по цена на страдањето на човештвото, јавува Агенција Анадолија (АА).
Во својата новогодишна порака Реџеп Таип Ердоган истакна дека глобалните сили не успеале да се справат со мноштвото предизвици со кои се соочи светот во 2021 година, особено со пандемијата на коронавирусот, климатската криза, нерегуларната миграција и регионалните конфликти.
„Непобитен факт е дека денешните развиени земји не се толку силни како што изгледаат и не можат да го водат светот низ овие кризи“, рече тој.
Ердоган истакна дека Турција работела напорно за да ги надмине различните проблеми за време на „предизвикувачката“ 2021 година.
Тој рече дека перформансите на турскиот здравствен сектор за време на пандемијата се светол пример за успесите на земјата, заедно со нејзините напори за социјална заштита и чекори за подобрување на безбедноста и политичката стабилност.
Претседателот ја повтори желбата на Владата на неговата партија да ја одведе Турција до поголеми економски височини со нејзиниот нов модел на политика фокусиран на инвестиции, вработување, производство, извоз и трговија.
„Инвестициите овозможени од Владата на Партијата за правда и развој (АК) во изминатите 19 години ќе се покажат како непроценливи во нејзината желба да ја зајакне турската економија“, рече тој.
„Нашата цел е да ја направиме Турција една од најголемите светски економии и ние сме подготвени да работиме заедно со секого кој ја дели оваа визија“, додаде Ердоган.
