Burak Bir
10 Декември 2020•Ажурирај: 11 Декември 2020
БАКУ (АА) - Турскиот претседател Реџеп Таип Ердоган изјави дека Турција може да ја отвори својата врата за Ерменија доколку Ереван преземе позитивни чекори кон регионалниот мир, јавува Агенција Анадолија (AA).
На заедничката прес-конференција со неговиот азербејџански колега Илхам Алиев во Баку, Ердоган рече дека немаат проблем со ерменскиот народ.
„Ние не го мразиме народот на Ерменија. Проблемот е во ерменската администрација. Во мојата земја живеат над 100.000 Ерменци“, потсети Ердоган.
Тој ја поздрави улогата на Русија во ставањето крај на судирите меѓу Азербејџан и Ерменија, кои траеја неколку недели.
„Не можам да го занемарам позитивниот пристап на рускиот претседател Путин, кој помогна процесот да оди во позитивна насока“, рече Ердоган.
Тој се осврна и на таканаречената резолуција на Националното собрание на Франција за признавање на Нагорно-Карабах како посебна република.
„[Резолуцијата] не ја прифаќа ниту Пашинијан“, рече тој, додавајќи дека францускиот претседател Емануел Макрон сè уште не ја научил политиката.
Додаде дека верува оти азербејџанската администрација ќе ја започне ерата на прогрес во Карабах за три до пет години.
