Beyza Binnur Dönmez
08 Ноември 2023•Ажурирај: 09 Ноември 2023
ЖЕНЕВА (АА) - Извршувањето воени дејства за систематско уништување на цивилните станови и инфраструктурата во Газа претставува „воено злосторство“, изјави денес експерт на ОН, пренесува Анадолу.
„Сега треба да дејствува светот за да се прекинат ужасните и немилосрдните напади врз цивилните живеалишта и инфраструктурата во Газа, што има огромна цена за човековиот живот“, изјави Балакришнан Рајагопал, специјален известувач на ОН за правото на соодветно домување.
„Извршувањето воени дејства со знаење дека тие систематски ќе ги уништат и оштетат цивилните станови и инфраструктурата, правејќи цел град – како што е градот Газа – непогоден за живеење за цивили, е воено злосторство“, рече Рајагопал.
Истакнувајќи дека бомбардирањето на станови, цивилни објекти и инфраструктура се строго забранети со меѓународните закони, тој нагласи дека таквите дела „се воени злосторства“ и, кога се насочени против цивилното население, тие исто така претставуваат „злосторства против човештвото“.
Користејќи го терминот „домицид“ за да се осврне на таквите систематски или широко распространети напади врз домувањето и цивилната инфраструктура, тој истакна дека „не се воени објекти“ цивилните станбени згради, болниците, амбулантите, бегалските кампови, училишта, црквите или џамиите, водната и електричната инфраструктура.
Тој истакна: „Дури и кога цивилните станови може да бидат користени од страна на борците за да се засолнат, како што се тврди во нападите на бегалскиот камп Џабалија, се забрануваат напади врз цели станбени блокови доколку тие доведат до непропорционална штета, смрт и раселување на голем број цивили.“
„Ниту едно утврдено право на самоодбрана според меѓународното право не може да ги покрие таквите напади“, рече Рајагопал и додаде: „Ова е особено случај кога правото на самоодбрана се тврди во контекст на окупација.“
„Цивилните станови во Израел, исто така, „не се воен објект“, нагласи известувачот, додавајќи дека „недискриминирачките ракетни напади врз нив од Газа или од друго место се воено злосторство“.
Во врска со наредбата за евакуација од северниот кон јужниот дел на Газа, Рајагопал рече: „Да се нареди евакуација на повеќе од еден милион луѓе од Северна во Јужна Газа е сурово и очигледно кршење на меѓународното хуманитарно право, знаејќи дека ќе биде невозможно да се обезбеди соодветно домување и хуманитарна помош, додека се одржува блокада, прекин на дистрибуција на вода, храна, гориво и лекови и постојано се напаѓаат патиштата за евакуација и 'безбедните зони'.“
„Овие акции на Израел претставуваат меѓународно злосторство“, рече тој.
Тој упати апел дека мора да се следи повикот за прекин на огнот на неодамнешната резолуција на Генералното собрание на ОН.
Најмалку 10.569 Палестинци, вклучително 4.324 деца и 2.823 жени, се убиени во израелските воздушни и копнени напади со неселективно бомбардирање на цивилни населби, станбени објекти, џамии, цркви и болници во Појасот Газа по прекуграничниот напад на Хамас на 7 октомври. Во меѓувреме, бројот на загинати во Израел изнесува речиси 1.600, според официјалните бројки.
Покрај големиот број жртви и масовните раселувања, основните резерви се при крај за 2,3 милиони жители на Газа поради израелската опсада.
