Esat Fırat
24 Септември 2021•Ажурирај: 25 Септември 2021
КУДС (АА) - Еврејските доселеници ги нападнаа Палестинците со камења и стапови во областа Хеброн на окупираниот Западен Брег, за време на посетата на амбасадорите на европските земји во регионот, јавува Агенција Анадолија (АА).
Според информациите добиени од очевидци, еврејските доселеници ги нападнале жителите на селото Сусија во Хеброн со камења и стапови, а израелските војници интервенирале со звучни бомби во судирот што се случил меѓу страните.
Соопштено е дека некои Палестинци се повредени, а првата помош е дадена на местото на настанот од страна на екипите за прва помош.
Во моментот на инцидентот, амбасадорите и конзулите на европските земји беа во посета на Палестинците кои живеат во селото Сусија и соседните села за да ја слушнат нивната мака што ја имаат како резултат на нападите на еврејските доселеници и на Израелската армија.
Канцеларијата на Европската Унија (ЕУ) во Ерусалим соопшти дека претставниците на мисијата на земјите од ЕУ, на чело со Свен Кун вон Бургсдорф, претставникот на ЕУ на окупираните палестински територии, беа во посета на селата на југот на Хеброн за да се запознаат со потешкотиите со кои се соочуваат од жителите на регионот.
Окупираниот Западен Брег е сведок на зголемени напади врз Палестинци од еврејски доселеници. Огромното мнозинство од нив се вооружени.
Според податоците на Канцеларијата за координација на хуманитарните работи на ОН (OCHA), од почетокот на годинава до 21 мај, евидентирани се 154 напади врз имотите на Палестинците, а повредени се 66 лица.
По окупацијата од 1967 година, Израел на подрачјето на палестинскиот Западен Брег изгради повеќе од 250 илегални населби во кои моментално живеат повеќе од 500.000 еврејски доселеници.
Новоизградените еврејски населби, според меѓународното право имаат статус на илегални населби, што го потврдуваат и низа резолуции на Обединетите нации (ОН).
