Данска ќе го повика американскиот амбасадор по именувањето специјален претставник на САД за Гренланд

Данскиот министер за надворешни работи изјави денес дека ќе го повика американскиот амбасадор во Копенхаген на разговори, откако американскиот претседател Доналд Трамп именуваше специјален претставник на САД за Гренланд, автономна територија во рамки на Кралството Данска, јавуваат медиумите, пренесува Анадолу.

Данска ќе го повика Кенет А. Хауери, американскиот амбасадор во Копенхаген, на објаснување откако Трамп го назначи Џеф Ландри, гувернерот на американската држава Луизијана, за специјален претставник на Вашингтон за Гренланд, објави „ДР њуз“.

„Ова е целосно неприфатливо. Затоа, во консултација со нашите колеги од Гренланд, одлучивме да го повикаме американскиот амбасадор на разговори во Министерството за надворешни работи“, изјави Расмусен за данскиот национален радиодифузер.

Тој нагласи дека Данска сака јасно објаснување зошто САД назначуваат специјален претставник за Гренланд, иако веќе имаат амбасадор акредитиран во Данска.

Трамп повторно го насочи вниманието кон Гренланд по неговиот реизбор за претседател, истакнувајќи ја стратешката локација на островот и богатите минерални ресурси.

Тој претходно го опиша поседувањето на Гренланд како „апсолутна неопходност“ за економската безбедност на САД, споредувајќи го стекнувањето со „голем договор за недвижнини“.

Сепак, ниту Данска ниту Гренланд не се заинтересирани да дадат зелено светло за сопственост на островот од страна на САД, како што постојано се изразуваше како одговор на предлозите на Трамп.

Гренланд, поранешна данска колонија, доби самоуправа во 1979 година и останува територија на Данска.

Во 2008 година беше одржан референдум на кој 75,5 отсто од гласачите го поддржаа Законот за самоуправа, што стапи на сила на 21 јуни 2009 година, со што Гренланд доби поголема автономија, додека Данска ги задржа надлежностите во надворешната политика, одбраната и безбедноста.