Гутереш: Авторитетот и кредибилитетот на СБОН сериозно нарушени поради неуспехот за прекин на огнот во Газа

ДОХА (АА) - Генералниот секретар на Обединетите нации (ОН), Антонио Гутереш, денес повика на хуманитарен прекин на огнот во Појасот Газа поради израелското бомбардирање на палестинската територија, јавува Анадолу.

Говорејќи на Форумот во Доха, Катар, Гутереш го критикуваше „силниот молк“ на Советот за безбедност на ОН за конфликтот во Газа.

„Ужасните напади на Хамас на 7 октомври, по кои започна немилосрдното израелско бомбардирање на Газа, беа пречекани со силен молк од страна на Советот. По повеќе од еден месец, Советот конечно ја усвои резолуцијата, кое го поздравувам“, рече тој.

„Одложувањето има своја цена, авторитетот и кредибилитетот на Советот се сериозно поткопани, и резолуцијата не се спроведува“, додаде тој.

Гутереш нагласи дека „нема ефикасна заштита на цивилите во Газа“.

„Бројот на цивилни жртви во Газа во толку краток период е тотално без преседан“, рече тој, истакнувајќи дека „здравствениот систем е во колапс“.

Челникот на ОН очекува „јавниот ред наскоро целосно да се сруши, а потоа да се појави уште полоша ситуација, вклучително и епидемиски болести и зголемен притисок за масовно раселување во Египет“.

Гутереш го повика Советот за безбедност на ОН „да изврши притисок за да се избегне хуманитарната катастрофа.“

Тој, исто така, го повтори својот „апел за прогласување хуманитарен прекин на огнот.“

„За жал, Советот за безбедност не успеа да го стори тоа, но тоа не го прави помалку неопходен, така што ветувам дека нема да се откажам“, порача Гутереш.

САД ставија вето на нацрт-резолуцијата на Советот за безбедност на ОН во петокот, со која се бараше итен прекин на огнот со цел запирање на крвопролевањето во Појасот Газа и сѐ поголемиот број на жртви.

Израел ја продолжи својата воена офанзива на Појасот Газа на 1 декември, по завршувањето на еднонеделната хуманитарна пауза со Хамас.

Најмалку 17.700 Палестинци загинаа, а над 48.780 лица се повредени во немилосрдните воздушни и копнени напади врз енклавата од 7 октомври, по прекуграничниот напад на Хамас.

Според официјалните податоци, бројот на загинати Израелци во нападот на Хамас изнесува 1.200.