БЕРЛИН (АА) – Германскиот канцелар Фридрих Мерц се соочи со неочекуван протест синоќа, кога десетици учесници демонстративно ја напуштија салата за време на неговото обраќање на церемонијата за доделување на наградата „Талисман“, организирана од Фондацијата за интеграција „Дојчландстифтунг“.

Штом конзервативниот лидер го започна својот говор, голем број присутни – најмногу млади мажи и жени – станаа, му свртија грб и во тишина излегоа од просторијата.

Видеоснимките споделени на социјалните мрежи ги прикажуваат протестантите како ја напуштаат салата, додека дел од гостите во првите редови збунето набљудуваат.

Годишната награда „Талисман“ им се доделува на мигранти со успешни животни приказни и на личности кои промовираат демократски вредности, социјална инклузија и интеграција.

Протестот беше одговор на изјавите што Мерц ги даде минатиот месец на настан во Потсдам.

Тогаш тој ги истакна строгите миграциски политики на неговата влада и зголемувањето на депортациите на нелегални мигранти, оценувајќи дека со тоа се „исправуваат грешки од минатото“.

„Но секако, сè уште го имаме овој проблем во градскиот пејзаж, и затоа нашата министерка за внатрешни работи дејствува на планови што ќе овозможат и спроведат депортации во поголем обем“, изјави Мерц.

И токму фразата „проблем во градскиот пејзаж“ предизвика жестоки реакции кај организациите за човекови права и опозициските политичари, кои го обвинија канцеларот за расистички и дискриминаторски изрази.

Критичарите оценија дека неговите зборови потсетуваат на реторика на крајната десница и дека на мигрантските заедници им се става стигма.