БЕРЛИН (АА) - Германскиот канцелар Фридрих Мерц денес изјави дека Киев и европските сојузници подготвиле нов предлог за мир во Украина, кој се однесува на територијалните прашања, а кој ќе биде разгледан со Американците во текот на викендот, јавува Анадолу.

Говорејќи на прес-конференција во Берлин, Мерц откри дека тој, францускиот претседател Емануел Макрон и британскиот премиер Кир Стармер вчера телефонски разговарале за новиот мировен предлог со американскиот претседател Доналд Трамп.

„Главното прашање овде е какви територијални отстапки е подготвена да направи Украина. Сепак, ова е прашање на кое првенствено мора да одговорат (...) украинскиот претседател и украинскиот народ, како што му ставивме до знаење и на претседателот Трамп“, рече Мерц.

„И ако сега продолжиме со овој процес како што предвидуваме, ќе има разговори со САД во текот на викендот. А потоа, можеби ќе има состанок тука во Берлин на почетокот на следната недела. Дали САД ќе учествуваат или не зависи многу од заедничкото изготвување на документите“, додаде тој.