БЕРЛИН (АА) - Германскиот министер за надворешни работи денес ја отфрли идејата за независна европска воена мисија за заштита на трговските бродови во Ормускиот Теснец, изјавувајќи дека на европските сили им недостасуваат потребните капацитети, јавува Анадолу.

„Не верувам дека Европа треба да следи независен тек во ова“, одговори министерот за надворешни работи Јохан Вадефул, на прес-конференцијата во Берлин, на прашањето дали европските земји би можеле да започнат сопствена операција за заштита на своите економски интереси.

„Мислам дека тоа нема смисла, барем не за германската Влада. Ако американските вооружени сили не се способни да обезбедат воена сигурност, тогаш веројатно ниту европските сили нема да можат да го сторат тоа“, рече Вадефул.

Шефот на германската дипломатија, исто така, ја исклучи можноста Европа да преговара за посебни договори со Иран за да се осигури безбеден премин за европските пловила.

Тој истакна дека Берлин сака тековниот конфликт да заврши колку што е можно побрзо и чека САД и Израел да заклучат дека ги постигнале своите воени цели, што би го отворило патот за дипломатски преговори.

„На крајот на краиштата, безбедната навигација во овој регион може да биде загарантирана само во рамките на нова безбедносна архитектура, тоа е она на што ќе треба да работиме“, изјави Вадефул, додавајќи дека за тоа се потребни разговори со земјите од регионот.

„Секако, во еден поствоен поредок, ние сме подготвени да преземеме одговорност за да обезбедиме дека тоа и понатаму ќе биде загарантирано“, додаде тој.