Германија „сериозно“ ја сфаќа руската воена закана дека на нишан ќе ги има европските престолнини

БЕРЛИН (АА) - Германија денес соопшти дека сериозно ги сфаќа руските воени закани дека ќе ги нишани европските метрополи, по одлуката на Соединетите Американски Држави (САД) да распоредат ракети со долг дострел во Германија, јавува Анадолу.

Осврнувајќи се на изјавите на Москва минатата недела дека европските земји ќе се доведат во опасност доколку прифатат распоредување на американски ракети со долг дострел, портпаролот на германската Влада, Штефен Хебестрајт, рече дека „таквите изјави секогаш треба да се сфаќаат сериозно“.

„Мислам дека тие не се вредни како вест, бидејќи тоа е веќе реакција на фактот дека руската Влада и руската војска веќе таргетираа европски метрополи“, рече тој на брифингот со новинарите во Берлин.

Истакна дека неговата земја „нема да биде исплашена“ од руските закани.

„Овие акции првенствено имаат за цел да ѝ наштетат на безбедноста на нашата земја“, изјави минатата недела рускиот заменик-министер за надворешни работи Сергеј Рјабков.

Опишувајќи ги акциите на САД како „една алка во синџирот на ескалација“, тој рече дека Русија ќе ја анализира ситуацијата и ќе одговори на „мирен, професионален начин“. „Без нервоза, без емоции, ќе разработиме, пред сè, воен одговор на оваа нова закана“.

Белата куќа на 10 јули соопшти дека САД ќе започнат со „епизодното распоредување на можностите за палба со долг дострел на нивната работна група во Германија во 2026 година, како дел од планирањето за трајно позиционирање на овие можности во иднина“.