БЕРЛИН (АА) - Германија продолжува со плановите за реформирање на застарениот Закон за државјанство, потег вкоренет во настојувањето на земјата да привлече квалификувани работници за да се справи со влошениот недостаток на квалификувана работна сила, јавува Анадолу.
Промените, исто така, имаат за цел да ја подобрат интеграцијата и учеството на имигрантите, кои остануваат главно недоволно застапени во политичката сфера.
Повеќе од 43 отсто од германските компании пријавиле недостиг на квалификувани работници овој јануари, што е намалено од највисокото ниво на сите времиња од речиси 50 отсто минатиот јули, покажуваат податоците на Институтот „Ифо“, еден од најголемите тинк-тенкови во земјата.
Прашањето влијае врз компаниите низ услужниот, индустрискиот и градежниот сектор, при што здравствената заштита, грижата за децата, инженерството и ИТ се посебни области на загриженост.
Кога Владата го изнесе планот во март, министерот за труд, Хубертус Хајл, рече дека обезбедувањето „база на квалификувана работна сила е една од најголемите економски задачи на Германија во следните неколку децении“.
Коалициската Влада на канцеларот Олаф Шолц има за цел да го финализира нацрт-законот пред летните одмори, по што ќе биде доставен на одобрување во Парламентот.
Канан Бајрам, искусен пратеник од ковладејачката Партија на зелените, за Анадолу изјави дека планираната реформа ќе го поедностави процесот и ќе овозможи повеќекратно државјанство за имигрантите.
„Се надевам дека наскоро ќе добиеме многу добра легислатива и ќе го олесниме животот на имигрантите тука“, рече таа.
„Работев како адвокат и знам дека сегашниот закон, со ограничувањата за двојното државјанство, создава многу проблеми за имигрантите, било овде или во нивната земја на потекло“.
Според официјалната статистика, над 9 милиони странски државјани живееле и работеле доволно долго во земјата за да аплицираат за германско државјанство, но и понатаму не сакаат да го сторат тоа, а повеќето од нив ги одложуваат апликациите, поради мачните бирократски процедури или строгите прописи.
Бајрам истакна дека постојниот германски Закон за државјанство е неправеден кон одредени имигрантски групи, особено кон турските граѓани.
Германија има 3 милиони Турци, од кои повеќето се деца или внуци на работници кои емигрирале во 1960-тите.
Околу 1,5 милиони од нив сè уште немаат германско државјанство поради дискриминаторското законодавство.
„Турските граѓани не сакаа да аплицираат бидејќи не сакаат да се откажат од својата националност“, рече Бајрам.
„Повеќекратно државјанство беше можно за секое лице кое доаѓа од земјите на Европската Унија, за Американците, но беше одбиено за многу други. Ние велиме дека овој закон, оваа практика е погрешна“, рече таа.
„Всушност, одамна беше познато дека овој закон е закон наменет за Турците. Тоа беше закон за дискриминација на турските граѓани. Сега ставаме крај на ова, го менуваме.“
- „Се работи и за политичко учество“
Многу имигрантски групи, вклучително и турските граѓани, често се наоѓаат во неповолна ситуација на германскиот пазар на труд и додека се занимаваат со бирократски работи.
Тие се исто така недоволно застапени во политичкиот живот, бидејќи многу од нив не можат да гласаат на локалните или националните избори.
Миколај Чеханович, висок експерт за имиграција, рече дека реформирањето на законот дефинитивно ќе ги реши овие проблеми преку зајакнување на интеграцијата и политичкото учество.
„Ова е задоцнета реформа која беше очекувана и на која се надеваа многу луѓе со години“, рече тој за Анадолу.
„По реформата, многу имигранти најверојатно ќе аплицираат за германско државјанство“, рече Чеханович.
„Можеби е подобро да се користи терминот учество. Ова би го зголемило учеството, се работи и за политичко учество и тоа е точка што сега се решава со оваа реформа“, рече тој.
Чеханович, кој е менаџер на непрофитната организација „Deutschlandstiftung Integration“, рече дека стекнувањето германско државјанство го зајакнува чувството на припадност кон земјата.
„Доколку мнозинството од општеството испрати сигнал дека се добредојдени, дека сите ние сме природни граѓани овде, и дека сакаме и можеме да живееме заедно на оваа основа, тогаш би се направил голем чекор напред. И затоа јас ги поддржувам, а „Deutschlandstiftung Integration“ ги поддржува овие чекори“, рече тој.
Секоја година во текот на изминатата деценија, бројот на имигранти кои станале државјани во Германија е под 170.000. Во 2022 година, вкупно 168.545 странци се стекнале со германско државјанство.
Чеханович рече дека Германија во моментов се соочува со значителен недостиг на квалификувани работници, а реформирањето на законодавството за државјанство и имиграција е исто така важно за да се реши овој голем проблем.
„Верувам дека Германија има егзистенцијален интерес да овозможи имиграција, колку што е можно повеќе и овој чекор кон модерниот закон за имиграција и современиот закон за натурализација е дел од овој пакет“, рече тој.
„Сите знаат за проблемот со недостигот на квалификувани работници во Германија и дека можеме да го одржиме нашиот просперитет и нашата иднина само со контролирана имиграција.“
