БЕРЛИН (АА) - Германија денес остро ги осуди најновите руски воздушни напади врз Киев, во кои беше погодена и зградата на дипломатското претставништво на Европската Унија (ЕУ), и посочи дека би можеле да следат построги европски санкции против Москва, јавува Анадолу.

„Русија повторно го нападна и бомбардираше Киев. Цивили, меѓу кои и деца, ги загубија своите животи, а нападнато беше и претставништвото на ЕУ“, изјави германскиот министер за надворешни работи Јохан Вадефул на прес-конференција во Талин, Естонија.

„Ова не може да остане без последици. Ќе разговараме за овие последици на претстојниот неформален состанок на европските министри за надворешни работи во Копенхаген“, рече тој, осврнувајќи се на собирот закажан за петок и сабота во данската престолнина.

Најмалку 14 лица, меѓу кои три деца, се убиени, а 48 повредени во руски напад врз Киев рано утринава, според украинските власти.

Претседателот на Европскиот совет, Антонио Коста, изјави дека зградата на дипломатската мисија на ЕУ е оштетена во „намерен руски напад“ и вети дека Европејците „нема да бидат заплашени“ од овој напад.