Servet Günerigök
24 Февруари 2022•Ажурирај: 24 Февруари 2022
ВАШИНГТОН (АА) ‒ Генералниот секретар на НАТО, Јенс Столтенберг, денеска силно го осуди рускиот „непромислен и неиспровоциран напад врз Украина“, велејќи дека тоа доведува во опасност безброј животи на цивили, јавува Агенција Анадолија (АА).
„Уште еднаш, и покрај нашите постојани предупредувања и неуморните напори да се вклучи во дипломатијата, Русија го избра патот на агресија против суверена и независна земја“, се вели во соопштението на Столтенберг.
Неговите забелешки дојдоа кратко откако рускиот претседател Владимир Путин објави специјална воена операција рано денеска во источна Украина во регионот Донбас. По објавата на Путин, огромни експлозии беа пријавени во украинскиот главен град Киев и градот Краматорск.
„Ова е сериозно кршење на меѓународното право, сериозна закана за евроатланската безбедност. Ја повикувам Русија да ја прекине воената акција веднаш и да го почитува суверенитетот и територијалниот интегритет на Украина“, рече секретарот на НАТО.
„Сојузниците на НАТО ќе се состанат за да разговараат за последиците на руските агресивни дејствија. Ние сме покрај луѓето во Украина во овие страшни времиња. НАТО ќе направи сѐ за да ги заштити и одбрани своите сојузници“, додаде тој.
