Газа: Хуманитарните организации поделија топли оброци за жителите на бегалскиот камп Нусејрат

СКОПЈЕ (АА) - Хуманитарни организации денеска дистрибуираа топли оброци за жителите на бегалскиот камп Нусејрат, каде илјадници луѓе се борат да преживеат среде продолжениот конфликт и влошената хуманитарна криза, јавува Анадолу.

Снимки од теренот прикажуваат големи толпи Палестинци кои се собираат во обид да добијат храна, со многумина кои се движат напред во надеж дека ќе обезбедат оброк за своето семејство.

Според извештаи на меѓународни организации и здруженија за човекови права, Израел од 2 март 2025 година ги држи затворени сите гранични премини во Газа, спречувајќи влез на неопходна храна, медицински материјали и друга хуманитарна помош, што дополнително ја влошува веќе критичната состојба.

Израелската армија ги продолжи нападите врз Појасот Газа на 18 март, при што од тогаш досега се убиени 1.827 Палестинци, а голем број се повредени, со што е нарушен прекинот на огнот и договорот за размена на заробеници, постигнат на 19 јануари.

Над 51.200 Палестинци се убиени, главно жени и деца, во бруталната израелска воена офанзива врз Газа од октомври 2023 година.

Меѓународниот кривичен суд во ноември минатата година издаде налози за апсење за израелскиот премиер Бенјамин Нетанјаху и неговиот поранешен министер за одбрана, Јоав Галант, за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата за неговите постапки во енклавата.