Враќањето на Сирија во Арапската лига предизвика загриженост во Израел

АЛ КУДС (ЕРУСАЛИМ) - Повторниот влез на Сирија во Арапската лига по 12 години суспензија предизвика загриженост во Израел, објавија вчера израелските медиуми, пренесува Анадолу.

Како што вчера објави весникот „Једиот ахронот“, израелскиот министер за одбрана Јоав Галант неодамна со командантите на војската го проценуваше враќањето на Сирија во панарапското тело.

„Израел оценува дека ова е лош развој на настаните краткорочно и долгорочно, бидејќи враќањето ќе стави крај на изолацијата на Башар ал Асад во арапскиот свет и сите израелски удари врз Сирија ќе бидат помалку легитимни“, наведува израелскиот медиум.

„Једиот ахронот“ објави дека некои во Израел сметаат дека е прерано да се проценуваат импликациите од враќањето на Сирија во организацијата со седиште во Каиро.

Израелскиот весник пишува дека според други, пак, повторното воспоставување на членството на Сирија во Арапската лига ќе ѝ наштети на воената акција на Израел во Сирија.

Израел повеќепати изведе напади врз Сирија, напаѓајќи ги силите на режимот на Асад и групите поврзани со Иран.

Во петокот Асад за првпат по 2011 година присуствуваше на годишниот арапски самит што се одржа во Саудиска Арабија.