ЊУЈОРК (АА)
– Ислам ДОГРУ
Најмалку 17.737 лица ги изгубија животите од почетокот на годината во случаи на вооружено насилство во Соединетите Американски Држави (САД), јавува Анадолу.
Во САД денес се одбележува Националниот ден за подигање на свеста за вооруженото насилство, а според Архивот за вооруженото насилство (GVA), кој ги архивира настаните на вооружено насилство во земјата, оваа година во САД се извршени 268 масовни убиства.
Само во последните пет месеци, 17.737 луѓе ги загубија животите, а 14.723 се повредени во вооружено насилство во различни региони на САД. Меѓу жртвите има 113 деца (од 0 до 11 години) и 642 деца (од 12 до 17 години). Исто така, регистрирано е дека 1.894 повредени деца се на возраст под 17 години.
Во вооружено насилство во кое учествувала и полицијата животот го загубиле 587 лица, додека 361 лице се повредени.
Податоците од Архивот за вооруженото насилство потврдуваат дека во 2022 година како последица на вооружено насилство животот го загубиле 44.362 лица, а 38.592 биле повредени. Во текот на минатата година во вооружено насилство загинале 1.683 деца на возраст под 17 години, додека повредени се 4.487 деца.
Архивот ги користи критериумите на Федералното истражно биро (ФБИ) за дефинирање на „масовен напад“.
Вооружените напади во кои освен напаѓачот животите ги губат најмалку четири лица, се сметаат за „масовен вооружен напад“.
Оваа дефиниција не ги вклучува профитните криминални активности, семејните убиства или слични акти на насилство, а на веб-страницата на Архивот масовните пукања се опишуваат како „главно американски феномен“.
Веќе девет години, 2 јуни е познат како Национален ден за подигање на свеста за вооруженото насилство со цел да се сврти вниманието кон вооруженото насилство и масовните вооружени напади кои предизвикаа бурни расправи во американското општество, особено во Конгресот.
По повод денот, невладините организации и групите против оружјето низ целата земја организираат настани во текот на целата недела, носејќи портокалова облека, со цел да оддадат почест на жртвите на вооружено насилство.
На овие настани се повикуваат членовите на американскиот Конгрес да преземат чекори за потребните правни прописи и бараат иднина без вооружено насилство во земјата.
Културата на поседување оружје е една од најдискутираните теми во САД, земјата со најмногу масовни вооружени напади во светот.
Од политика до граѓанско општество, групите против оружје во земјата ги искажуваат своите барања за законски ограничувања на правото на лично оружје. САД се издвојуваат како единствена земја во светот каде што бројот на оружје што го поседуваат цивилите е поголем од бројот на жителите во земјата.
Во истражувањето спроведено по пукањето во училиште на 24 мај 2022 година, во кое, во американската сојузна држава Тексас загинаа 21 лице, меѓу кои 19 деца, беше утврдено дека на секои 100 луѓе паѓаат 120,5 парчиња оружје.
На Фолкландските Острови, кои се на второ место по САД по цивилно вооружување, има 62 пиштоли на 100 луѓе, што е речиси половина во однос на САД.
Во претходно споменатото истражување, забележано е дека Јемен, во кој повеќе од 7 години се води граѓанска војна, е на трето место со 53 оружја на 100 жители, додека во земјите како Јужна Кореја и Јапонија овој сооднос е блиску до 0.2.
Се проценува дека 393 милиони од 857 милиони оружја што ги поседуваат цивили во светот се наоѓаат во САД, што одговара на речиси 46 отсто од светските залихи.
Се наведува дека во САД, каде што се случуваат масовни престрелки секоја година, 4 од секои 100.000 луѓе умираат како резултат на вооружено насилство, што е 18 пати повисока стапка од просекот во другите развиени земји.
Стапката на жртви на вооружено насилство во 2019 година во САД беше четири на 100.000 луѓе, што е 18 пати повисока од просечната стапка во другите развиени земји.
Додека населението на САД сочинува четири отсто од светската популација, самоубиствата од огнено оружје во 2019 година во САД сочинуваат 44 отсто од самоубиствата со огнено оружје во светот.
Според истражувањето на компанијата „Галуп“ спроведено во октомври 2020 година, околу 44 отсто од возрасните Американци живеат во домови со оружје, а околу една третина поседуваат оружје.
САД се една од трите земји во светот каде што е уставно право да се носи или поседува оружје. Во две други земји, Мексико и Гватемала, забележано е дека стапката на поседување оружје во однос на населението е речиси една десетина од онаа на САД.
Додека многу земји низ светот преземаат правни мерки против вооруженото насилство, и покрај загубата на илјадници животи, само околу половина од возрасните Американци поддржуваат построги закони за оружје и политички реформи, а се проценува дека овој став во општеството го продолжува циклусот на смртоносно насилство.
