ИСТАНБУЛ (АА) - Дваесет Палестинци, меѓу кои петмина новинари и еден пожарникар, се убиени, а неколкумина се ранети денес во израелскиот напад врз медицинскиот комплекс „Насер“ во Кан Јунис, во јужниот дел на Појасот Газа, соопштија здравствените власти и очевидци, јавува Анадолу.

Според новинарот на Анадолу, израелската армија го гранатирала горниот кат од зградата за итни случаи, позната како кат „Ал-Јасин“.

Медицински извори за Анадолу изјавија дека бројот на жртви во медицинскиот комплекс „Насер“ се зголемил од осум на 20 откако се убиени уште 12 лица.

Министерството за здравство на Газа потврди дека 20 Палестинци, меѓу кои пациенти, здравствени работници, припадници на цивилната одбрана, на новинарски екипи, се убиени, а неколкумина се повредени во нападот.

Министерството соопшти дека во два воздушни напада израелската армија го погодила четвртиот кат на една од зградите на комплексот, истакнувајќи дека вториот напад се случил додека спасувачките екипи пристигнале за да ги евакуираат ранетите и да ги извлечат мртвите.

Државната Палестина ТВ објави дека меѓу починатите е и нејзиниот снимател Хусам ал-Масри, а катарската телевизија Ал Џезира потврди дека е убиен и нејзиниот фотограф Мухамед Салама.

Медицински извори цитирани од Анадолу, исто така, ја потврдија смртта на фоторепортерката Мерјем Абу Дага.

Во израелскиот напад врз болницата е убиен и фоторепортерот Моаз Абу Таха.

Медицински извори за Анадолу потврдија и дека Ахмед Абу Азиз, хонорарен новинар за туниски и марокански новински страници, починал од повредите здобиени во израелскиот напад.

Палестинската цивилна одбрана соопшти дека во нападот е убиен и возачот на противпожарното возило и дека седуммина од неговиот тим се повредени додека се обидувале да ги спасат повредените и да ги извлечат телата.

Со новите смртни случаи бројот на новинари убиени во Газа од октомври 2023 година се искачи на 245, според Канцеларијата за медиуми на Владата во Газа.

Смртоносниот напад врз палестинските новинари предизвика бран осуди од медиумските куќи.

Асошиејтед прес потврди дека Абу Дага (33), хонорарна новинарка која известувала за АП од почетокот на војната во Газа, е меѓу убиените.

Абу Дага известувала за хуманитарната криза во болницата „Насер“, известувајќи за лекарите што се борат да ги спасат децата што страдаат од тешка неисхранетост, а кои претходно немале здравствени проблеми, се вели во соопштението.

Весникот „Индепендент Арабија“ со седиште во Лондон, исто така, објави за смртта на Абу Дага, нарекувајќи ја „пример за храброст и посветеност во пренесувањето на вистината“.

И Ројтерс потврди дека двајца негови известувачи биле цел на израелскиот напад: снимателот Ал-Масри, кој е убиен во нападот, и фотографот Хатем Халед, кој е ранет.

Израел уби речиси 62.700 Палестинци во бруталната офанзива во Газа од октомври 2023 година. Воената кампања ја опустоши енклавата, која се соочува со глад.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата за своите воени дејства во енклавата.