Во израелскo бомбардирање е убиено цело семејство во Јужен Либан

БЕЈРУТ (АА) - Четири члена на исто семејство, вклучително и едно дете, беа убиени во израелски напад врз нивниот дом во Јужен Либан рано утринава, објавија локалните медиуми, јавува Анадолу.

Државната новинска агенција ННА објави дека еден маж, неговата сопруга и нивните два сина ги загубиле животите во нападот што беше насочен кон градот Јаржуа.

Во нападот била уништена семејната куќа.

Новиот напад се случи еден ден откако најмалку 23 лица беа убиени во израелските напади во пограничниот град Аитарун.

Израел започна огромна воздушна кампања низ Либан против, како што тврди, локации на Хезболах од 23 септември, при што загинаа најмалку 1.542 луѓе, беа повредени над 4.555 и раселени повеќе од 1,34 милиони луѓе.

Воздушната кампања е ескалација од едногодишната прекугранична војна меѓу Израел и Хезболах од почетокот на неговата офанзива врз Појасот Газа, во која Израел уби речиси 42.300 луѓе, повеќето жени и деца, од 7 октомври минатата година.

И покрај меѓународните предупредувања дека Блискиот Исток е на раб на регионална војна среде немилосрдните напади на Израел врз Газа и Либан, тој го прошири конфликтот на 1 октомври со започнување копнен упад во Јужен Либан.