Високата претставничка на ЕУ, Калас, и министрите за надворешни работи на ЕУ во посета на Украина

КИЕВ (АА) - Високата претставничка на Европската Унија (ЕУ) за надворешни работи и безбедносна политика, Каја Калас, и министрите за надворешни работи на земјите од ЕУ пристигнаа во Лавов, Украина, известува Анадолу.

Украинскиот министер за надворешни работи Андриј Сибиха во објавата на својот профил на платформата X наведе дека високата претставничка на ЕУ, Калас, и министрите за надворешни работи на земјите од ЕУ пристигнале во Лавов во рамките на активностите по повод Денот на Европа на 9 мај.

Истакнувајќи дека пристигнувањето на оваа голема делегација од Европа во Лавов ја покажува клучната улога на Украина во одбраната на слободата и вредностите на Европа, Сибиха во објавата наведе: „Ова е историски состанок во историско време.“

Известувајќи дека денес во Лавов ќе се одржат два состанока, Сибиха рече:

„Пред нас се две важни прашања: состанокот на министрите за надворешни работи на ЕУ и (состанок на) Главната група на Специјалниот суд за злосторства од агресија во Украина.“

- Средба на украинскиот премиер Шмигал и високата претставничка на ЕУ, Калас

Украинскиот премиер Денис Шмигал во писмената објава на својот профил на Телеграм објави дека се сретнал со високата претставничка на ЕУ за надворешни работи и безбедносна политика, Каја Калас, која е во посета на неговата земја.

Шмигал наведе дека за време на билатералната средба со Калас разговарале за ситуацијата на линијата на фронтот во руско-украинската војна.

Тој изјави дека ѝ се заблагодарил на Калас за нејзината иницијатива ЕУ да издвои фонд во висина од 1 милијарда евра за поддршка на Украина и истакна дека очекуваат наскоро ЕУ да го одобри 17. пакет санкции кон Русија.