СКОПЈЕ (АА) – Градот Там Кок во провинцијата Нин Бин во Виетнам, познат како „Заливот Ха Лонг на копно“, продолжува да го привлекува вниманието на туристите со своите спектакуларни карстни карпи, живописни пејзажи и рекреативни тури по реката, јавува Анадолу.

Сместен околу 100 километри јужно од виетнамската престолнина Ханој, Нин Бин се издвојува со своите природни убавини, како и по производството на ориз, туризмот и традиционалните занаети.

Тука се наоѓа и комплексот Транг Ан, заштитен од УНЕСКО, кој заедно со Там Кок се вбројува меѓу најпознатите туристички дестинации во земјата.

Реката што тече низ областа претставува главна атракција за туристите, кои ја истражуваат географијата на регионот пловејќи со мали чамци меѓу оризовите полиња и високите варовнички формации.

Покрај туристичката понуда, секојдневниот живот на локалното население е тесно поврзан со реката – жителите на Там Кок ги перат алиштата на нејзините брегови, сушат мешунки на сонцето и го користат просторот крај реката за различни активности.

Десетици чамци наредени покрај брегот го дополнуваат шаренилото на градот, каде што туризмот се испреплетува со традиционалниот начин на живот, нудејќи уникатно искуство за посетителите кои ја избираат оваа дестинација.