Венецуела уапси 6 странски државјани, од кои тројца Американци, за наводен заговор за атентат врз Мадуро

ВАШИНГТОН (АА) – Венецуелските власти соопштија дека приведени се шест странски државјани за наводен заговор за атентат врз претседателот Николас Мадуро, јавува Анадолу.

Министерот за внатрешни работи, Диосдадо Кабело, ги потврди апсењата на прес-конференција во Каракас и рече дека тројцата осомничени од САД, двајца од Шпанија и еден чешки државјанин планирале да го убијат Мадуро и да организираат „терористички акти“ во земјата.

Кабело рече дека 400 пушки и пиштоли, наводно испратени од САД, биле запленети за време на разузнавачка операција, кои, според него, било планирано да се искористат за „предизвикување насилства“ во Венецуела.

Тој тврди дека двајцата шпански државјани кои се уапсени биле поврзани со Националниот разузнавачки центар на Шпанија.

Извори од шпанската влада негираа дека лицата работеле за разузнавачкиот центар, според извештаите на шпанските медиуми.

Шпанската амбасада во Каракас, наводно, испратила формална нота до Министерството за надворешни работи на Венецуела, барајќи потврда на идентитетот и националноста на приведените и разјаснување на обвиненијата против нив.

По претседателските избори во Венецуела на 28 јули, Шпанија го поддржа опозицискиот лидер Едмундо Гонзалес и му даде заштита во Мадрид, што предизвика дипломатска криза.

По одлуката на шпанскиот Парламент да го признае Гонзалес за претседател на Венецуела и зборовите на министерката за одбрана Маргарита Роблес за Мадуро дека е „диктатор“, министерот за надворешни работи на Венецуела, Иван Гил, го отповика амбасадорот на земјата во Мадрид на консултации.

Претседателот на Парламентот, Хорхе Родригез, исто така, побара да се прекинат „сите дипломатски, економски и трговски односи“ со Шпанија.