Вашингтон пост: „Со пресудите во случајот на убиството на Кашоги, Саудиска Арабија бесрамно си поигра со правдата“
Раководството на „Вашингтон пост“ го повика американскиот Конгрес и ЦИА што поскоро да го истражат убиството на Кашоги, а остра критика е упатена за однесувањето на администрацијата на Трамп
ВАШИНГТОН (AA) – Уредништвото на весникот „Вашингтон пост“ (The Wаshington Post) ги обвини властите на Саудиска Арабија дека со вчерашните пресуди во случајот со убиството на новинарот Џамал Кашоги бесрамно си поиграле со правото и правдата, пренесува Агенција Анадолија (АА).
Судот во Саудиска Арабија вчера изрече смртни казни на петмина обвинети за вмешаност во минатогодишното брутално убиство на Кашоги, а уште тројца обвинети ги осуди на затворски казни од вкупно 24 години.
„Саудиска Арабија во случајот на убиството на Кашоги донесе пресуда со која бесрамно си поигрува со правдата“, се наведува во реакцијата на уредништвото на „Вашингтон пост“, за кој своевремено пишуваше и убиениот Кашоги.
Уредништвото понатаму во текстот наведува дека со пресудата е повредено семејството на Кашоги и целата јавност и се предупредува дека прифаќањето на таквата пресуда би било морално погрешно и многу опасно.
„Со прифаќањето на таквата пресуда меѓународната заедница би испратила порака за толерирање на смртоносниот авантуризам на безобѕирниот престолонаследник на Саудиска Арабија“, се наведува во колумната.
Во текстот се критикува и изјавата на саудискиот обвинител, кој рече дека убиството на Кашоги не е извршено со предумисла, и потсетуваат дека во извештајот на специјалната известувачка на Обединетите нации, Агнес Калмард, се наведува спротивната констатација.
Раководството на „Вашингтон пост“ го повика американскиот Конгрес и Централната разузнавачка агенција (ЦИА) што поскоро да го истражат убиството на Кашоги, а остра критика е упатена за однесувањето на администрацијата на американскиот претседател, Доналд Трамп.
„Многу е неизвесно дали Мухамед бин Селман би можел така ладнокрвно да го спречи задоволувањето на правдата да не ја имаше поддршката од претседателот Трамп“, се наведува во текстот.
Главниот државен обвинител на Саудиска Арабија, Сауд бин Абдула ал Муаџаб, во понеделникот соопшти дека судот осудил на смрт пет лица поради учество во убиството на новинарот Кашоги. Уште три лица се осудени на затворска казна во вкупно траење од 24 години. Три лица се ослободени од обвинението.
Тој на конференцијата за новинари рече дека во случајот со убиството на Кашоги меѓу обвинетите не беа поранешниот советник на кралот, Сауд ал Кахтани, и поранешниот саудиски конзул во Истанбул, Мухамед ал Отеиби. Обвинение не е подигнато ниту против поранешниот заменик-шеф на саудиската Разузнавачка служба, Ахмед Асири, кој исто така е под истрага.
Џамал Кашоги, новинар и колумнист на весникот „Вашингтон пост“ е убиен на 2 октомври 2018 година во саудискиот Конзулат во Истанбул.
Деталите за бруталното убиство на саудискиот новинар Кашоги сè уште не се расветлени. Властите на Саудиска Арабија дополнително признаа дека Кашоги е убиен и дека не го напуштил Конзулатот, како што првобитно тврдеа. Посмртните останки на Кашоги не се пронајдени.
