Буркина Фасо воведува визни ограничувања за американските државјани како контрареакција

КИГАЛИ (АА) – Владата на Буркина Фасо најави воведување визни ограничувања за државјаните на Соединетите Американски Држави, како одговор на неодамнешната одлука на САД да ги заострат условите за влез за граѓаните на оваа западноафриканска земја, јавува Анадолу.

Во соопштение објавено во вторникот, министерот за надворешни работи Жан-Мари Карамоко Траоре истакна дека одлуката е донесена согласно со принципот на реципроцитет.

Најавата доаѓа по две недели откако САД, на 16 декември, соопштија дека целосно ќе го суспендираат влезот за државјани на Буркина Фасо, Мали и Нигер, со почеток од 1 јануари 2026 година.

„Во согласност со принципот на реципроцитет, Владата на Буркина Фасо ја информира националната и меѓународната јавност за својата одлука да примени еквивалентни визни мерки кон државјаните на Соединетите Американски Држави“, се наведува во соопштението.

Американските ограничувања за патување, кои го опфаќаат и Мали, беа образложени со недоволни информации за проценка на ризиците што можат да ги претставуваат одредени странски државјани.

Министерот Траоре нагласи дека Буркина Фасо останува посветена на меѓусебното почитување, суверената еднаквост на државите и принципот на реципроцитет во меѓународните односи.

Во соопштението се додава дека земјата и понатаму е отворена за соработка со сите партнери, под услов таа да се темели на заемно почитување и реципрочни интереси.

Претходно во вторникот, Министерството за надворешни работи на Мали соопшти дека веднаш ќе воведе исти визни услови и барања за американските државјани какви што се применуваат за граѓаните на Мали.