Бројот на убиени Палестинци во израелските напади во Газа достигна 42.700

АНКАРА (АА) - Уште најмалку 115 Палестинци се убиени во немилосрдните израелски напади во Појасот Газа, со што вкупниот број на убиени од минатата година се зголеми на 42.718, соопшти денес Министерството за здравство во енклавата, јавува Анадолу.

Најмалку 100.282 Палестинци се повредени во тековниот израелски напад врз Газа во текот на годината - со што е премината границата од 100.000, истакна Министерството.

„Израелската окупација изврши седум масакри врз семејства во последните 48 часа, што резултираше со 115 убиени и 487 повредени лица“, соопшти Министерството.

„Многу луѓе сè уште се заробени под урнатините и на патиштата бидејќи спасувачите не можат да дојдат до нив“, се додава.

Не почитувајќи ја резолуцијата на Советот за безбедност на ОН која повикува на итен прекин на огнот, Израел ја продолжи својата брутална офанзива врз Појасот Газа по нападот на палестинската група Хамас на 7 октомври 2023 година.

Израелската офанзива го расели речиси целото население на територијата, а тековната блокада доведе до сериозен недостиг на храна, чиста вода и лекови.

Напорите за посредување предводени од САД, Египет и Катар за постигнување договор за прекин на огнот во Газа и размена на затвореници меѓу Израел и Хамас не успеаја поради одбивањето на израелскиот премиер Бенјамин Нетанјаху да ја запре војната.

Израел, исто така, се соочува со случај за геноцид пред Меѓународниот суд на правдата за неговите постапки во Газа.