Ikrame Imane Kouachi
13 Декември 2024•Ажурирај: 13 Декември 2024
ГАЗА (АА) - Бројот на убиени во израелскиот воздушен напад вчера врз бегалскиот камп Нусејрат во централниот дел на Појасот Газа се искачи на 33, а 84 се повредени и исчезнати, соопшти денес владината канцеларија за медиуми со седиште во Газа, јавува Анадолу.
Во соопштението канцеларијата го осуди „ужасниот масакр“ насочен кон станбен блок во кој се сместени десетици цивили, меѓу кои жени, деца и постари лица.
„Во областа што беше цел има повеќе станбени згради густо населени со раселени лица што веќе ги напуштиле своите домови поради претходните бомбардирања“, се вели во извештајот.
Нападот, се вели, е дел од „поширока политика на принудно раселување и кршење на меѓународното право и злосторство против човештвото“.
Во текот на 14-месечната војна против Газа, повторните напади на Израел врз цивилни згради и објекти - џамии и цркви, резиденции, болници и други - предизвикаа меѓународна осуда и беа идентификувани како веројатни воени злосторства.
Во октомври 2023 година Израел започна геноцидна војна во Појасот Газа во која досега се убиени повеќе од 44.800 луѓе, главно жени и деца.
Втората година од геноцидот во Газа наиде на зголемена меѓународна осуда, при што официјални лица и институции ги осудија нападите и блокирањето на испораката на помош како намерен обид за уништување на населението.
Меѓународниот кривичен суд (МКС) во ноември издаде налози за апсење на израелскиот премиер Бенјамин Нетанјаху и поранешниот шеф на одбраната Јоав Галант за воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата за неговата војна против Газа.
