Во израелската геноцидна војна врз Газа убиени над 61.300 Палестинци, од кои 201 починати од глад

Најмалку 61.330 Палестинци се убиени во геноцидната војна на Израел во Појасот Газа од октомври 2023 година, вклучително и 201 кои починале од глад, соопшти денес Министерството за здравство, јавува Анадолу.

Во своето дневно ажурирање, Министерството истакна дека 72 тела и 314 повредени лица се донесени во болниците во последните 24 часа, со што вкупниот број повредени се зголеми на 152.359 од почетокот на војната.

Исто така, евидентирани се четири нови смртни случаи од глад и неисхранетост, со што вкупниот број смртни случаи поврзани со глад се искачи на 201, од кои 98 се деца.

Министерството предупреди дека многу жртви остануваат заробени под урнатините или лежат на улиците, бидејќи тимовите за итни случаи и цивилната одбрана не се во можност да стигнат до нив поради интензитетот на израелското бомбардирање и сериозниот недостиг на опрема.

Бројот на Палестинци убиени додека чекале хуманитарна помош се искачи на 1.772, од кои 16 во последните 24 часа. Над 12.249 лица се повредени од 27 мај, кога контроверзната Хуманитарна фондација за Газа започна со работа.

Израелската Армија ги продолжи нападите врз Појасот Газа на 18 март и оттогаш убиени се 9.824 Палестинци, а повредени уште 40.318, со што се прекрши договорот за прекин на огнот и размена на затвореници што стапи на сила во јануари.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.