Белата куќа: САД чекаат одговор од Хамас за предложениот договор за Газа

ВАШИНГТОН (АА) - САД сè уште чекаат одговор од палестинската група Хамас за предложениот договор за прекин на огнот во Газа, изјави вчера советникот за национална безбедност Џејк Саливан, јавува Анадолу.

„Топката е на теренот на Хамас, дали ќе ја прифатат или не. Сега чекаме одговор од Хамас“, изјави Саливан за новинарите.

„САД се во контакт со катарските посредници кои на Хамас му го пренесоа предлогот на израелските преговарачи“, рече Саливан, додавајќи дека Хамас треба да го прифати предлогот.

Саливан додаде дека директорот на ЦИА, Вилијам Бернс, ќе биде во главниот град Доха и ќе се консултира со премиерот на Катар, како и со неговиот емир.

„Бернс ќе биде доста заинтересиран да слушне од прва рака, лично, каква била природата на тие разговори и каде одат работите оттука“, рече тој.

Американскиот претседател Џо Бајден во петокот рече дека Израел претставил трифазен договор со кој ќе се стави крај на непријателствата во Газа и ќе се обезбеди ослободување на заложниците држени во крајбрежната енклава. Планот вклучува прекин на огнот, размена на заложници и затвореници и реконструкција на Газа.

Израел ја продолжи својата брутална офанзива врз Газа по прекуграничниот напад на Хамас на 7 октомври минатата година, и покрај Резолуцијата на Советот за безбедност на ОН со која се бара итен прекин на огнот.

Оттогаш, повеќе од 36.500 Палестинци се убиени во Газа, огромно мнозинство се жени и деца, а речиси 83.000 други се повредени, според локалните здравствени власти.

По речиси осум месеци од почетокот на израелските напади, огромни делови од Газа се во урнатини, а недостигаат храна, чиста вода и лекови.

Израел е обвинет за геноцид пред Меѓународниот суд на правдата (МСП), кој во својата последна одлука му нареди на Тел Авив веднаш да ја прекине операцијата во Рафа, каде што засолниште од војната најдоа над еден милион Палестинци.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.