Бајден му се извини на Зеленски поради доцнењето на одлуката за новиот пакет воена помош

АНКАРА (АА) - Американскиот претседател Џо Бајден денес му се извини на украинскиот колега Владимир Зеленски поради доцнењето во одобрувањето на пакетот за воена помош на Украина, јавува Анадолу.

„Се извинувам што со недели не знаев што ќе се случи, во однос на финансирањето“, му рекол Бајден на Зеленски на средбата во Париз.

Осврнувајќи се на противењето на Републиканската партија на пакетот во американскиот Конгрес, Бајден рече:

„Имавме проблеми да го добиеме законот што требаше да го усвоиме, но конечно го направивме тоа.“

Бајден во април потпиша закон за трошење од 95 милијарди долари со кои се финансираат неговите главни приоритети за националната безбедност, вклучително и повеќе од 60,8 милијарди долари за Украина.

Во Париз, Бајден најави дополнителен пакет помош од 225 милиони долари за Украина за реконструкција на електричната мрежа во земјата и го пофали отпорот на Украина.

„Знаете, не потклекнавте, воопшто не попуштивте, продолжувате да се борите на начин кој е извонреден, само извонреден, и ние нема да ви свртиме грб“, додаде Бајден.

Бајден и Зеленски вчера присуствуваа на меѓународната церемонија одржана од францускиот претседател Емануел Макрон по повод 80-годишнината од Денот Д и битката за Нормандија за ослободување на Франција за време на Втората светска војна.

Зеленски претходно во петокот се обрати пред францускиот Парламент.