Американските власти им наредија на федералните сили да ги апсат лицата што ги „провоцираат протестите“

ВАШИНГТОН (АА) - Американскиот министер за правда, Вилијам Бар, соопшти дека им наложил на федералните безбедносни сили да ги апсат провокаторите, вклучително и левичарското движење АНТИФА, кои протестите во градот Минеаполис поради убиството на Афроамериканецот Џорџ Флојд ги претворија во насилни, пренесува Агенција Анадолија (АА).

Истакнувајќи дека гласовите на мирољубивите и легитимни демонстранти се потиснати од радикалните групи, Бар во својата писмена изјава рече: „Радикалите и провокаторите ги користат протестите за нивните насилни и екстремистички агенди. Сега е време да се спротивставиме на насилствата и да ги запреме.“

Нагласувајќи дека е одговорност на државните и локалните самоуправи да обезбедат соодветни безбедносни сили против актите на насилство, Бар истакна дека за да се обезбеди ред може да се распоредат и силите на Националната гарда.

„Ќе им наложиме на федералните безбедносни сили да ги апсат радикалните провокатори кои ги претворија протестите во насилни и го кршат федералниот закон“, истакна Бар.

Нагласувајќи дека мрежата на здружени терористички задачи на ФБИ во 56 региони ќе се користи за координација меѓу федералните и локалните власти при апсењето на овие сторители, Бар рече: „Насилните дејствија се поттикнати и извршени од страна на АНТИФА и други слични групи. Насилните дејства се внатрешен тероризам и ќе биде соодветно одговорено на тоа.“

Флојд (46) беше уапсен минатиот понеделник, откако, наводно, се обидел да користи фалсификувана банкнота од 20 долари во локална продавница.

На видеоснимките на Фејсбук се гледа како има лисици на рацете и како соработува.

Но, полицијата тврди дека тој се спротивставил на апсењето, по што полицаецот Шовин клекнал со коленото на неговиот врат, и покрај континуираните молби на Флојд дека не може да дише.

Набргу потоа Флојд изгубил свест, но полицаецот ја задржал својата позиција врз жртвата.