АНКАРА (АА) - Американскиот државен секретар Марко Рубио денес пристигна во Израел во официјална посета, неколку дена по израелскиот ракетен напад врз лидерите на Хамас во главниот град на Катар, Доха, објави i24 њуз, пренесува Анадолу.

Се очекува Рубио да се сретне со израелскиот премиер Бенјамин Нетанјаху.

Во објава на американската компанија за социјални медиуми X пред неговото заминување, Рубио напиша: „На пат кон Ерусалим. Мојот фокус ќе биде на обезбедување враќање на заложниците, наоѓање начини за хуманитарната помош да стигне до цивилите и справување со заканата што ја претставува Хамас“.

Израел во вторникот нападна станбен комплекс во кој беа сместени лидерите на Хамас во Доха. Пет членови на Хамас и еден катарски безбедносен службеник беа убиени во нападот.

Катар, заедно со Египет и САД, е посредник во индиректните преговори меѓу Хамас и Израел за постигнување размена на затвореници и договор за прекин на огнот во Газа. Во војната на Израел во енклавата, од нападите на Хамас на 7 октомври 2023 година, убиени се повеќе од 64.000 Палестинци а енклавата е опустошена.

Израел проценува дека 48 негови државјани сè уште се наоѓаат во Газа, од кои 20 живи. Додека, повеќе од 10.000 Палестинци се затворени во Израел во сурови услови на тортура, гладување и медицинско запоставување.