АНКАРА (АА) - Медиумите во Австралија објавија дека Ахмед ел Ахмед е човекот кој храбро интервенираше врз вооружениот напаѓач земајќи му го оружјето на плажата Бонди во Сиднеј, Нов Јужен Велс (НЈВ), во напад во кој животот го загубија 11 лица, известува Анадолу.

Според веста што ја објави порталот News.com.au, камерите го снимиле моментот кога еден човек истрчал кон еден од напаѓачите од зад грб, му ја зграпчил пушката и го неутрализирал за време на вооружениот напад на плажата Бонди во Сиднеј.

Човекот кој скокна врз еден од двајцата напаѓачи и го разоружал, спасувајќи многу животи, беше идентификуван како Ахмед ел Ахмед, продавач на зеленчук.

Ахмед Ел Ахмед (43) беше застрелан двапати за време на нападот и однесен е во болница на лекување.

Мустафа, братучедот на Ахмед ел Ахмед, за 7News изјавил дека неговиот братучед оваа вечер ќе биде опериран.

Мустафа објави дека Ахмед ел Ахмед, татко на две деца, немал никакво искуство со оружје.

Австралиските медиуми и јавното мислење се фокусираа на моментите кога Ахмед ел Ахмед интервенирал врз напаѓачот, а снимките од инцидентот во голем број се споделени на социјалните мрежи.

Австралијците ја опишаа интервенцијата на Ахмед како херојски чин.

- Вооружен напад во Австралија

Вооружен напад се случи на плажата Бонди во Сиднеј, Нов Јужен Велс, Австралија. Во овој напад животот го загубија 11 лица, а 29 лица, меѓу кои и 2 полицајци, се повредени.

Објавено е дека еден од осомничените починал, додека другиот осомничен е приведен.

Австралискиот премиер Ентони Албанезе на прес-конференција изјави дека нападот бил насочен против еврејските Австралијанци.

Претставниците на муслиманската заедница во Австралија го осудија нападот и изразија солидарност со лицата засегнати од нападот и нивните семејства.