24 Палестинци се убиени во израелските напади врз Газа

ГАЗА (АА) - Најмалку 24 Палестинци, вклучително и четири медицински лица, се убиени денес кога израелската Армија изврши напади врз домови во Појасот Газа, соопштија медицински извори и официјални лица, јавува Анадолу.

Извори за Анадолу изјавија дека телата на 18 Палестинци, кои беа убиени во израелските воздушни напади насочени кон нивните домови во северниот дел на Газа, биле донесени во болницата „Камал Адван“.

Министерството за здравство одвоено ја потврди смртта на палестински тинејџер во напад на израелско беспилотно летало, чија цел бил објект.

Израелските сили се повлекоа од болницата во Беит Лахија откако упаднаа во неа, принудувајќи ги пациентите и ранетите да се евакуираат, велат очевидци.

Хосам Абу Сафија, директор на болницата, рече дека установата е „преплавена од жртви“.

„Има голем број убиени и ранети, вклучително и четворица од нашиот медицински персонал“, рече тој, додавајќи:

„Ситуацијата внатре и околу болницата е застрашувачка, а на нас почнува да ни снемува медицински материјал, бидејќи и понатаму пристигнуваат жртви.“

Според изворите, индонезиска медицинска делегација била евакуирана од болницата во градот Газа со помош на возила на палестинската Црвена полумесечина, координирана со израелските власти.

Во друг напад, двајца Палестинци се убиени, а неколку други беа повредени кога е погодено училиштето Ал-Рафије, во кое се засолнети раселените цивили во Џабалија, во северниот дел на Појасот Газа.

Исто така, во јужниот дел на Газа, тројца Палестинци се убиени, а други беа повредени во воздушен напад чија цел беа цивили во Кирбет ал-Адас во близина на градот Газа.

Досега, Израел има убиено повеќе од 44.000 Палестинци во неговите напади врз Газа од нападите на Хамас на 7 октомври 2023 година.

Минатиот месец, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата за неговата војна против Газа.

Групата за човекови права „Амнести интернешнал“, во својот последен извештај, рече дека „нашла доволна основа да заклучи дека Израел извршил и продолжува да врши геноцид врз Палестинците во Газа“.